சனி, டிசம்பர் 20, 2014

பேஷாவர் தாக்குதல் சொல்லி விட்டு செல்லும் அரசியல் -

திருமுருகன் காந்தியின் கட்டூரை !!
தன் குழந்தையை இழக்கும் சோகம் எந்த பெற்றோருக்கும் வரக்கூடாது.
தாலிபன்களின் இந்த காட்டுமிராண்டித்தனம்.
இந்த நிகழ்வு, ‘ஜார்ஜ் புஷ்’ போட்ட யூரேனிய குண்டுகளால் புற்றுநோயால் வாடும் ஈராக்கிய குழ்ந்தைகளுக்கு மருந்துகளை அனுப்பாமல் உலக அளவில் ஈராக்கிற்கு தடை கொண்டு வந்து பில்கிளிண்டன் பல்லாயிரம் குழந்தைகளை கொலை செய்ய வைத்ததையும் நினைவில் கொள்ளச் செய்கிறது.
ஈழத்தில் இதே போன்று மருந்துகளை அனுப்பாமல் குழ்ந்தைகள் மீது கொலை செய்ய அனைத்து உதவிகளையும் நேரடியாக செய்த இந்திய அரசு மீதும், மறைமுக உதவி செய்த மேற்குலகம்-ஐ.நா- பாகிஸ்தான் - சீனா மீதும் நமக்கு வருகிறது. 30,000 தமிழ்க் குழந்தைகள் கொலை செய்யப்பட்டனர்.
பெஷாவர் நிகழ்வு சில முக்கிய செய்திகளை நம் கவனத்திற்கு கொண்டு வருகிறது. அதை விவாதிப்பது அவசியம். ஏனெனில் இது நாளை நமக்கும் நிகழலாம்.
விடுதலைப் போராட்டம் என்பது ஒடுக்கப்படுபவனுக்கும், சுரண்டப்படுபவனுக்கும், ஆக்கிரமிக்கப்படுபவனுக்குமான ஒன்று. அதை மதம் பெற்றுத் தராது. ஏனென்றால் மதத்தின் பெயரால்-இனத்தின் பெயரால் இவை அனைத்தும் நிகழ்கிறது.
அடிப்படைவாதத்தினை வைத்து மக்கள் போராட்டத்தினையோ, வலிமையான ஆயுதப்போராட்டத்தினை நடத்திவிட முடியாது. அப்படி நடத்தப்படும் போராட்டங்கள் காட்டுமிராண்டித் தனத்தில் தான் சென்று முடிகிறது என்பதை தாலிபன்கள் நீண்ட நாட்களாக நிரூபித்துக்கொண்டிருக்கிறார்கள்.
எதிரிகள் எப்பொழுதும் போராடும் மக்களை, இயக்கத்தினை ஒரு கொடூர எதிர்வினை செய்வதற்கு தூண்டுவார்கள். வடமேற்கு பாகிஸ்தானில் தாலிபன்கள் அதிகாரம் செலுத்தும் இடங்களில் பாகிஸ்தான் - அமெரிக்க ராணுவத்தினர் பல்லாயிரம் மக்களை கொலை செய்தார்கள். இதில் குழந்தைகளும் அடக்கம்.
தங்களுக்கு ஏற்படும் இழப்பிற்கு பழிவாங்க தாலிபன்கள் குழந்தைகளை கொலை செய்திருப்பதாக அறிவிக்கிறார்கள். இக்கொடூரக் கொலை நிகழ்விற்காகவே பாகிஸ்தானும், அமெரிக்காவும் காத்திருக்கின்றன. ஆப்கானிஸ்தானை விட்டு, வடமேற்கு பாகிஸ்தானை விட்டு அமெரிக்கா வெளியேறக்கூடாது என்பதற்கு இது ஒரு அச்சாரமாக அமையலாம்.
மத்திய ஆசியாவில் இதைப் போன்ற காட்டுமிராண்டி செயல்களை ஐ.எஸ்.ஐ.எஸ் நிகழ்த்துகிறது. இது உலக மக்களிடம் வெறுப்பினை ஏற்படுத்தி அமெரிக்கா , பிரிட்டன் உள்ளிட்ட மேற்குலக நாடுகளின் கொலைகளை நியாயப்படுத்துகிறது.
நாம் ஒன்றினை நினைவில் வைப்போம்.
தாலிபன்கள் , ஐ.எஸ்.ஐ.எஸ் , அல் கொய்தா ஆகியவை அமெரிக்காவின் ஆதரவோடே வளர்த்தப்பட்டன. தொடர்ந்து மேற்குலகினால் கொலை செய்யப்படுகிற இசுலாமிய மக்களிடம் இருந்த நியாயமான போராட்ட உணர்வினை ‘மத வெறியைக் கொண்டு’ நெறிப்படுத்தி போராளி இயக்கங்கள் உருவாவது மேற்குலகிற்கு தேவைப்படுகிறது.
ஏனெனில் மத அடிப்படைவாதிகள் மூர்க்கமானவர்கள். ஏகாதிபத்தியத்தின் சதிகளை புரிந்து செயல்படும் அளவிற்கு அரசியல் பயிற்சியற்றவர்கள். அவர்களை காட்டுமிராண்டி எதிர்வினைகளை செய்ய வைப்பது சுலபம். இதன் மூலம் இவர்களை உலக அளவில் தனிமைப்படுத்தி எளிதில் வேட்டையாடலாம். முற்றும் முழுதுமாக இவர்களை மேற்குலகம் அழித்துவிட முடியும்.
ஆனால் அவ்வாறு அழித்துவிட்டால், பின்னர் தனது ஆதிக்கத்தினை இப்பகுதியில் செலுத்துவதற்கு வாய்ப்பு கிடைக்காது. மேலும் அந்த அரசியல் வெற்றிடத்தினை முற்போக்கு அரசியல் கைப்பற்றினால் மேற்குலக எண்ணை வளம் சுரண்டல் பாதிக்கப்படும். எனவே இவர்களை குறைந்த பலம் கொண்டவர்களாகவும், தேவைப்படும் பொழுது பலமானவர்களாகவும் மாற்றி தனது சுயநலத்தினை செய்து முடிக்கிறது.
இது போன்ற ஒரு குழுவினை ராஜதந்திர தளத்திலும் உருவாக்கி வைத்திருக்கும் மேற்குலகம். இவர்கள் ஆப்கனின் அதிபர் ‘கர்சாய்’ போன்றவர்கள். இவர்கள் சுதந்திரம், தனியுரிமை, மக்கள் உரிமை என்றெல்லாம் பேசமாட்டார்கள். ஜனநாயகம், வணிகமயமாக்கல், அமைதி, முன்னேற்றம் எனப் பேசுவார்கள். இவர்களும் தாலிபன் போன்ற குழுக்களும் சமபலம் கொண்டவர்களாக மாற்றிவைத்து அம்மக்களை மேற்குலகம் சுரண்டுவார்கள். ‘கர்சாய்’ ஆட்சிக்கு வந்த உடன் காபூலில் திறக்கப்பட்ட கடைகளுல் ‘ பென்ஸ்’ காரின் கடையும் ஒன்று என்பதை மறக்கக் கூடாது. தமிழீழத்தில் இப்படியான பல அரசியல்வாதிகள் உருவாகி இருப்பதை நாம் மறக்கக் கூடாது. மேற்குலகம் விடுதலை பெற்றுத்தரும் எனப் பேசும் அமெரிக்க வாழ் பூசாரிகளையும் கவனத்தில் எடுத்தல் அவசியம்
ஐ.எஸ்.ஐ.எஸ், இசுரேலுக்கும்- மேற்குலகுக்கும் செல்லும் எண்ணை குழாய்களை இதுவரை சேதப்படுத்தவில்லை. அதை தடை செய்யவில்லை. அதை தகர்த்தார்கள் என்றால் அமெரிக்காவின் பின்வாசல் உதவி நின்று போகும் என்பது தெரியும்.
மத அடிப்படைவாதம் மக்களை மூர்க்கமாக்கும். அதுவே இன்று பலநூறு அப்பாவி பிஞ்சுக் குழந்தைகளை கொலை செய்யவைத்திருக்கிறது.
மதவெறி, இனவெறி, சாதிவெறி அடுத்த மக்களை நேசிக்க கற்றுத் தருவதில்லை. இதை அடிப்படையாகக் கொண்டு இயங்கும் குழுக்கள் காட்டுமிராண்டி கும்பலாகவே இருக்கும். இவர்களை சார்ந்து இருக்கிற மக்களுக்கு அழிவையே தேடித்தருவார்கள். விடுதலையை இவர்களால் ஒருபொழுதும் வெல்லமுடியாது.
இசுலாமியரே , இசுலாமியரை கொலை செய்யும் பணியை மேற்குலகம் சிறப்பாக செய்து முடிக்கிறது.
பாலஸ்தீனத்தினை ஆதரிக்கும் சில தமிழ் இசுலாமிய நண்பர்கள் குர்திஸ்தான் விடுதலையை பேச மறுப்பார்கள். ஈரானின் மீது நிகழும் ஒடுக்குமுறையை பேச மறுப்பார்கள். பலுசிஸ்தானில் சியா மக்களை இனப்படுகொலை செய்யும் பாகிஸ்தானுக்கு எதிராக பேச தயங்குவார்கள். ஏனெனில் இசுலாத்தில் ஒரு மார்க்கத்திற்கு விசுவாசமாக இருப்பது, அதன் அடிப்படைவாதத்தினை ஏற்பதாக மாறுவது அமெரிக்கா போன்ற எதிரிகளுக்கு வசதியாக மாறுகிறது.
முற்போக்கு சிந்தனையால் உருவான குர்து போராளிப்படை, தன்னை எதிர்த்து போராடும் அரசுகள் சன்னி பிரிவு, சியா பிரிவு சேர்ந்தவர்களாக இருந்தாலும், அதன் அப்பாவி மக்களை பாதுகாத்தார்கள். போரில் ஒரு புறம் ஈராக்கின் சியா அரசால் விரட்டப்பட்ட சன்னி பிரிவு மக்களுக்கும், ஐ.எஸ்.ஐ.எஸ் படையால் விரட்டப்பட்ட சியா பிரிவு மக்களைக்கும் பாதுகாப்பளித்தார்கள்.
பெசாவரில் நிகழ்ந்த குரூரம் சொல்லிவிட்டு சென்ற அரசியலை மறக்கவேண்டாம்.


தி

வெள்ளி, டிசம்பர் 05, 2014

இஸ்லாமின் பார்வையில் முதியோர்கள்


அல்லாஹ் உங்களை (ஆரம்பத்தில்) பலவீனத்திலிருந்து உங்களை படைத்தான். பிறகு பலவீனத்திற்குப் பின் (உங்களுக்குச்) சக்தியை (வாலிபத்தை) உண்டாக்கினான். அந்தப் பலத்திற்குப் பின் பலவீனத்தையும் (முதுமையின்) நரையையும் இறைவன் ஆக்கினான். திருக்குர்ஆன் (30:54)
மனிதனின் குழந்தைப் பருவத்தையும், முதுமைப் பருவத்தையும் இறைவன்பலவீனம்என்பதாகவே அடையாளப்படுத்துகிறான். அப்படி என்றால் முதுமைக் காலத்தைகுழந்தைப் பருவம்என்றும், முதியவர்களைகுழந்தைகள்என்றும் நாம் அழைக்க வேண்டும்.
நம் வீட்டின் தாத்தாக்கள், பாட்டிகள் வயதால், அனுபவத்தால் பழுத்த பழங்கள். ஆனால்...? உடலாலும் உள்ளத்தாலும் அதன் உணர்வுகளாலும் குழந்தைகளைப் போன்றவர்கள் என்பதே இறைவனின் ஏற்பாடு.
உண்மை தான், உடலின் தோல்கள் எல்லாம் சுருங்கிய நிலையில் தலையிலே பளிச்சிடும் நரையோடு கண்ணிலே கண்ணாடி, கையிலே கைத்தடி என உடலின் சிறு சிறு அசைவுகளுக்கும் குழந்தையைப் போல் ஒரு துணை தேடுகின்ற பொக்கை வாய் பருவமாகும்முதுமை’.
எனவே நாம் நம்மின் தாத்தாக்களை பாட்டிகளை ஒரு குழந்தையைப் போல் பார்த்துப் பார்த்துப் பத்திரமாய் அரவணைத்து கொள்ளல் வேண்டும். இச்செயல் இறைவனுக்கு மிகவும் பிடித்தமானதாகும்.
பெற்றோருக்கு உபகாரம் செய்திட வேண்டுமென்று (இறைவன்) கட்டளையிடுகிறான். அவ்விருவரில் ஒருவரோ அல்லது இருவருமோ உம்மிடத்தில் நிச்சயமாக முதுமை அடைந்து விட்டால் அவர்களைச்சீஎன்று கூடச் சொல்ல வேண்டாம். அவ்விருவரையும் (உம்மிடத்திலிருந்து) விரட்டவும் வேண்டாம். இன்னும் அவ்விருவரிடமும் கனிவான கண்ணியமான பேச்சையே பேசுவீராக. இன்னும் இரக்கம் கொண்டு பணிவு என்னும் இறக்கையை அவ்விருவருக்காகவும் நீர் தாழ்த்துவீராக’. (17:24)
என் பெற்றோர்கள் முதுமை அடைந்து விட்டால் அவர்களிடம் எப்படி பேச வேண்டும்? அவர்களின் முன் எவ்வாறு நடந்து கொள்ள வேண்டும்? அவர்களை எவ்வாறு மதிக்க வேண்டும்? எப்படி கவனித்துக் கொள்ள வேண்டும்? என்பதையே இறைவன் இவ்வசனத்தில் நமக்கு கற்றுத் தருகிறான்.
ஒரு முறை பெருமானார் ஸல்லல்லாஹு அலைஹி வஸல்லம் அவர்களின் பால்குடித் தந்தை வருகிறார்கள். உடனே நாயகம் ஸல்லல்லாஹு அலைஹி வஸல்லம் அவர்கள் எழுந்து தங்களின் மேற்துண்டை விரித்து அதிலே அமர வைக்கிறார்கள். பின்பு பல்குடித் தாயான ஹலீமா அம்மையார் வருகிறார்கள். அவர்களை மேற்துண்டின் இன்னொரு பகுதியிலே அமர வைத்து கண்ணியம் செய்தார்கள்.
இதுபோன்றே பெருமானார் ஸல்லல்லாஹு அலைஹி வஸல்லம் அவர்கள் வந்தால் ஃபத்திமா ரளியல்லாஹு அன்ஹா அவர்கள் எழுந்து நின்று வரவேற்பார்கள், கண்ணியம் செய்வார்கள். இம்முறையே இன்று நாம் நமது பெற்றோர்களிடம் நடந்து கொள்ள வேண்டிய வழிமுறையாகும்.
நரை விழுந்த ஒரு முதியோருக்கு கண்ணியம் வழங்குவது, இறைவனை கண்ணியப்படுத்தும் உன்னதமான செயல்களில் ஒன்றாகும்என்றார்கள் நாயகம்.
மூத்தோர் சொல் அமிழ்தம்என்பது பழமொழி. உண்மை தான். ‘அறிவாளியிடம் கேட்பதை விட ஒரு அனுபவசாலியிடம் கேள்என அரபியிலே ஒரு பழமொழி உண்டு. இவ்வுலகத்தின் சகல காரியங்களிலும் முதிர்ச்சியை நல்ல அனுபவத்தைக் கொண்டவர்கள் முதியோர்கள் மட்டுமே. முதியோர்களை முழுமையாக பயன்படுத்திக் கொள்வது உலகிற்கான உயிர் நாடியாகும்.
இப்படியான மேன்மைகளை தாங்கியிருக்கிற முதியோர்களை மதிப்பதும், அவர்களை கண்ணியப்படுத்துவதும் இறைத் தூதர்களான நபிமார்கள் மற்றும் நபித்தோழர்களின் வழிமுறையாகும்.
ஒரு முறை அபூபக்கர் ரளியல்லாஹு அன்ஹு அவர்கள் வயது முதிர்ந்த தனது தந்தை அபூகுஹாபா அவர்களை இஸ்லாத்தைத் தழுவும் பொருட்டு பெருமானாரிடம் அழைத்து வருகிறார்கள். அபூபக்கர் ரளியல்லாஹு அன்ஹு அவர்களின் வயது முதிர்ந்த தந்தையைப் பார்த்த நாயகம் ஸல்லல்லாஹு அலைஹி வஸல்லம் அவர்கள் உதிர்த்த வார்த்தைகள் நம் ஆழ்மனதில் பதித்துக் கொள்ள வேண்டிய ஒன்றாகும்.
அபூபக்கரே, வயது முதிர்ந்த இவர்களை வீட்டிலே விட்டு விட்டு வந்திருக்கலாமே? நான் வந்து சந்தித்து இருப்பனேஎன்றார்கள் நாயகம்.
யா ரசூலல்லாஹ், நீங்கள் என் தந்தையை வந்து சந்திப்பதை விட என் தந்தை உங்களை வந்து சந்திப்பது தான் ஏற்றமான செயலாகும்என அபூபக்கர் ரளியல்லாஹு அன்ஹு அவர்கள் பதிலுரைத்தார்கள்.
பின்பாக அபூகுஹாபா அவர்கள் இஸ்லாமிய மார்க்கத்தை ஏற்றார்கள் என்பது வரலாறு.
ஒரு நாள் வயது முதிர்ந்த முதியவர் ஒருவர் பெருமானாரை சந்திக்க வருகைத் தருகிறார். அங்கு கூட்டமாக அமர்ந்திருந்த நபர்களோ அம்முதியவருக்கு வழி விடாமல் தாமதப்படுத்தினார்கள். இதை பார்த்துக் கொண்டிருந்த நாயகம் ஸல்லல்லாஹு அலைஹி வஸல்லம் அவர்கள் உடனே நபித்தோழர்களுக்கு ஓர் உபதேசம் செய்தார்கள்.
யார் சிறியோர்களுக்கு இரக்கமும், முதியோருக்கு மரியாதையும் செய்யவில்லையோ அவர் நம்மை சார்ந்தவர் அல்லஎன்றார்கள் நாயகம்.
ஆக, முதியோர்களை மதிப்பதும் அவர்களிடம் கண்ணியமாக நடந்துக் கொள்வதும் இஸ்லாமிய வழிமுறையாகும். முதியோர்களை உதாசீனப்படுத்துபவன் இஸ்லாமிய வழிமுறைக்கு அப்பாற்பட்டு நடக்கிறான் என்பதே இஸ்லாம் வழங்குகிற தீர்ப்பாகும்.
பெருமானார் ஸல்லல்லாஹு அலைஹி வஸல்லம் அவர்கள் பெரியோர்களும், சிறியோர்களும் கலந்து இருக்கிற சபையில் ஏதேனும் கேள்விக் கேட்டால், சிறுவர்களுக்கு அக்கேள்விக்கான பதில் தெரிந்த போதும் கூட, தங்களை விட வயதில் மூத்தவர்கள் அமர்ந்திருக்கிற இச்சபையில் முதியோர்களுக்கு கண்ணியம் தர வேண்டும். மரியாதைக் கொடுக்க வேண்டும் என்பதற்காக வாய்மூடி அமைதியாக இருந்து விடுவார்கள்என அபூ ஸயீதுல் குத்ரி ரளியல்லாஹு அன்ஹு அவர்கள் அறிவிக்கிறார்கள்.
ஆனால் இன்றோ முதியோர்கள் ஒரு சுமையாகவும், தொல்லையாகவும், நெற் பதர்களைப் போலப் புறம் தள்ளப்படுகிறார்கள். இப்படியாக முதியோர்களை நாம் பாதுகாக்க தவறி விட்டதினால் உண்டான விளைவு என்ன தெரியுமா?
சுமார் 30 ஆண்டுகளுக்கு முன்புமுதியோர் இல்லம்என்கிற வார்த்தையே நமக்கு புதிதாகவும் புதிராகவும் தென்பட்டது. ஆனால் தற்பொழுதோ முதியோர் இல்லங்கள் குறித்து பத்திரிகையில் விளம்பரம் செய்யும் அளவிற்கு வளர்ந்து விட்டது கேவலம். இது இச்சமூகத்திற்கான சாபக்கேடாகும்.
நம் சிரங்கைக் கொண்டுச் சூரியனை மறைத்து விட முடியுமா என்ன? முதுமையும் முதியோர்களும் இறைவனின் படைப்பியல் கோட்பாடாகும்.
முதுமையையும், முதியோர்களையும் ஒதுக்குவது, புறக்கணிப்பது இறை நியதியின் புறக்கணிப்பாகும்.
முதுமையை வென்றெடுப்பதில் இன்றைய நவீன அறிவியலும் தோற்றுப் போன ஒன்றே. வெற்றி என்றும் முதுமைக்கே நமக்கல்ல.
உண்மை தான். 2020–ல் உலகில் ஆயிரம் மில்லியன் முதியவர்கள் இருப்பார்கள். அதில் இந்தியாவில் மட்டுமே 142 மில்லியன் முதியவர்கள் இருப்பார்கள் என்கிறது உலக சுகாதார நிறுவனம்.
இயற்கையாகவே முதுமையின் வலியும், அதனால் ஏற்படும் பலகீனமும், தனிமையும் மிகுந்த வேதனைத் தரக்கூடிய ஒன்றாகும். இந்நிலையில் நாம் அவர்களை புறந்தள்ளுவது கொடிய ரணத்தை அவர்களுக்கு ஏற்படுத்தும் என்பது நிச்சயம்.
நாயகம் ஸல்லல்லாஹு அலைஹி வஸல்லம்முதுமையின் கஷ்டத்தை விட்டும் இறைவா என்னை பாதுகாத்தருள்என பலமுறை பிரார்த்தனை செய்தார்கள்.
அப்துல்லா இப்னு அம்ரு இப்னு ஆஸ் என்கிற நபித் தோழர் அதிகமாக குர்ஆன் ஓதுபவர்களாக இருந்தார்கள். பெருமானார் அவர்கள்அப்துல்லாவே, அதிகமாக குர்ஆன் ஓதும் நபருக்கு இறைவன் ஆயுளை நீளமாக்கித் தருகிறான். எனவே இதன் காரணமாக நீங்கள் முதுமையும் அதனால் ஏற்படும் சடைவையும் அனுபவிக்கக் கூடும். சிரமம் எடுத்து அதிகமாக குர்ஆன் ஓதுவதை குறைத்துக் கொள்ளுங்கள்என உபதேசம் செய்தார்கள்.
நாயகம் ஸல்லல்லாஹு அலைஹி வஸல்லம் அவர்கள் சொன்னதைப் போன்று அப்துல்லாஹ் அவர்களுக்கு இறைவன் நீண்ட ஆயுளை தந்தான். ‘பெருமானார் ஸல்லல்லாஹு அலைஹி வஸல்லம் அவர்கள் குர்ஆன் ஓதுவதில் எனக்கு வழங்கியிருந்த அனுமதியை நான் பயன்படுத்தி இருக்க வேண்டுமேஎன முதுமையின் சிரமத்தை உணர்ந்த போது அப்துல்லா இப்னு அம்ரு இப்னு ஆஸ் கவலையோடு சொன்னார்கள் என சரித்திரம் சொல்கிறது.
அனுதினமும் நாயகம் ஸல்லல்லாஹு அலைஹி வஸல்லம் அவர்கள் அதிகாலையிலும், அந்தி மாலையிலும் ஒரு சில குறிப்பிட்ட பிரார்த்தனைகளை வழமையாக செய்பவர்களாக இருந்தார்கள். அதிலேஇறைவா, மோசமான முதுமையை விட்டு உன்னிடம் நான் பாதுகாப்புத் தேடுகிறேன்எனவும் தினம் தினம் பிரார்த்தனை செய்தார்கள்.
ஒரு இளைஞன் ஒரு முதியவரின் வயதிற்கு கண்ணியம் செய்தால், அந்த இளைஞனுக்கு அவனின் வயோதிகத்தில் அவனை கண்ணியம் செய்யக் கூடிய ஒரு நபரை இறைவனே ஏற்படுத்துகிறான்என்றார்கள் நாயகம்.
ஆக இன்று நாம் முதியவர்களை மதித்து நடந்தால் நம்மின் வயோதிகத்தில் நாம் மதிக்கப்படுவோம், அரவணைக்கப்படுவோம். இல்லையேல் முதியோர் இல்லங் களில் அடைக்கப்படுவோம்.

முதியோர்களை மதிப்போம், இறையருள் பெறுவோம்.