இறைவழியில் செலவு செய்தல்

---

இவ்வுலகில் வாழும் மனிதர்களுக்கு இவ்வுலகம் நிரந்தரமில்லை, ஏனெனில் இது அழிந்துவிடக் கூடியது.       

அல்லாஹ் சொல்கிறான்: 

اِعْلَمُوْۤا اَنَّمَا الْحَيٰوةُ الدُّنْيَا لَعِبٌ وَّلَهْوٌ وَّزِيْنَةٌ وَّتَفَاخُرٌ بَيْنَكُمْ وَتَكَاثُرٌ فِى الْاَمْوَالِ وَالْاَوْلَادِ‌ كَمَثَلِ غَيْثٍ اَعْجَبَ الْكُفَّارَ نَبَاتُهٗ ثُمَّ يَهِيْجُ فَتَرٰٮهُ مُصْفَرًّا ثُمَّ يَكُوْنُ حُطٰمًا‌ وَفِى الْاٰخِرَةِ عَذَابٌ شَدِيْدٌ ۙ وَّمَغْفِرَةٌ مِّنَ اللّٰهِ وَرِضْوَانٌ‌ وَمَا الْحَيٰوةُ الدُّنْيَاۤ اِلَّا مَتَاعُ الْغُرُوْرِ‏

நன்கு அறிந்து கொள்ளுங்கள்: இந்த உலக வாழ்க்கை விளையாட்டும், கேளிக்கையும், வெளிப்பகட்டும் மற்றும் உங்களிடையே ஒருவருக்கொருவர் பெருமையடித்துக் கொள்ளுதல், செல்வங்கள், குழந்தைகள் ஆகியவற்றில் ஒருவரையொருவர் மிஞ்சிவிட முற்படுதலுமேயன்றி வேறில்லை. அதற்கான உவமை: மழை பொழிந்திடும்போது அதன்மூலம் விளைகின்ற தாவரங்களைப் பார்த்து விவசாயிகள் மகிழ்ச்சியடைவது போன்றதாகும். பின்னர், அதே பயிர் காய்ந்துவிடுகின்றது. அது மஞ்சளித்துப் போவதையும், பின்னர், பதராகிவிடுவதையும் நீர் பார்க்கலாம். (இதற்கு மாறாக) மறுமை எத்தகைய இடமெனில், அங்கு கடும் தண்டனை இருக்கிறது. அல்லாஹ்வின் மன்னிப்பும் திருப்தியும் இருக்கின்றன. ஆனால், உலக வாழ்க்கை ஓர் ஏமாற்றுச் சாதனமே தவிர வேறெதுவுமில்லை.

(அல்குர்ஆன் : 57:20)

" எனவே மறுமை வாழ்க்கைதான் நிரந்தரமானது.

இவ்வுலகில் நமக்குக் கொடுக்கப்பட்டிருக்கும் பொருள் வசதி ஒரு அமானிதாகும். அதை நாம் சரிவர பயன்படுத்தவேண்டும். ஏனெனில் அதைப் பற்றிய கேள்விகள் மறுமையில் கேட்கப்படும். நமது உயிரும், உடைமையும் இறைவனுக்குச் சொந்தமானவை. நம்மிடமிருந்து அவன் விலைக்கு வாங்கி கொண்டான்.

அல்லாஹ் கூறுகிறான்:

اِنَّ اللّٰهَ اشْتَرٰى مِنَ الْمُؤْمِنِيْنَ اَنْفُسَهُمْ وَاَمْوَالَهُمْ بِاَنَّ لَهُمُ الْجَــنَّةَ‌  يُقَاتِلُوْنَ فِىْ سَبِيْلِ اللّٰهِ فَيَقْتُلُوْنَ وَ يُقْتَلُوْنَ‌وَعْدًا عَلَيْهِ حَقًّا فِى التَّوْرٰٮةِ وَالْاِنْجِيْلِ وَالْقُرْاٰنِ‌  وَمَنْ اَوْفٰى بِعَهْدِهٖ مِنَ اللّٰهِ فَاسْتَـبْشِرُوْا بِبَيْعِكُمُ الَّذِىْ بَايَعْتُمْ بِهٖ‌  وَذٰ لِكَ هُوَ الْفَوْزُ الْعَظِيْمُ‏

 "உண்மையாக, அல்லாஹ் இறைநம்பிக்கையாளர்களிடமிருந்து அவர்களின் உயிர்களையும், உடைமைகளையும் சுவனத்திற்குப் பகரமாய் விலைக்கு வாங்கிக் கொண்டான்". (09:111)

நபி(ஸல்) அவர்களும் /அவர்களின் தோழர்களும்தங்களுக்குக்கொடுக்கப்பட்ட செல்வங்களில் வீண்விரயம் செய்யாமலும், கஞ்சத்தனம் செய்யாமலும் நடுநிலைமையுடன் நடந்து கொண்டார்கள். இறைவழியில் அதிகம் செலவிடுபவர்களாக இருந்தார்கள்.எனவே இப்படியான மனிதர்கள்தாம் இம்மையிலும், மறுமையிலும் வெற்றி பெறுபவர்கள். இதற்கு மாறாக பொருட்களை அதிகம் சேகரித்து வைத்துக் கொண்டு அதை இறைவழியில் செலவுச் செய்யாமல் அழிந்து போனவர்களும் வரலாற்றில் இடம் பெற்றிருக்கிறார்கள். இவர்களில் இம்மை, மறுமை வாழ்வு வீணாகப் போய் விட்டது.

இறை வழியில் (தர்மம் செய்யாமல்) கஞ்சத்தனமாக இருந்து, அதன் காரணமாக அழிந்து போனவர்களைப் பற்றி *திருக்குர்ஆன் மற்றும் இஸ்லாமிய வரலாறுவிரிவாகக் குறிப்பிடுகிறது.இதில் முதன்மையான இரண்டு நபர்கள்* 

1. காரூன் (Qarun) - பெரும் செல்வந்தர்

காரூன் என்பவன் மூஸா (அலை) அவர்களின் காலத்தில் வாழ்ந்தவன். அவன் அளவிட முடியாத செல்வம் படைத்தவராக இருந்தான்.

 * அவனின் செல்வம்: காரூனின் கஜானாத் திறவுகோல்களைச் சுமப்பதற்கே ஒரு பலசாலி மனிதர்கள் கொண்ட குழு தேவைப்படும் என்று குர்ஆன்

اِنَّ قَارُوْنَ كَانَ مِنْ قَوْمِ مُوْسٰى فَبَغٰى عَلَيْهِمْ‌ وَاٰتَيْنٰهُ مِنَ الْكُنُوْزِ مَاۤ اِنَّ مَفَاتِحَهٗ لَـتَـنُوْٓاُ بِالْعُصْبَةِ اُولِى الْقُوَّةِ اِذْ قَالَ لَهٗ قَوْمُهٗ لَا تَفْرَحْ‌ اِنَّ اللّٰهَ لَا يُحِبُّ الْفَرِحِيْنَ‏

உண்மை யாதெனில், காரூன், மூஸாவின் சமுதாயத்தைச் சேர்ந்தவன். அவன் தன் சமூகத்திற்கு எதிராக வரம்புமீறி நடந்தான். மேலும், நாம் அவனுக்கு எந்த அளவுக்கு செல்வக் கருவூலங்களை வழங்கியிருந்தோமெனில், அவற்றின் சாவிகளை பலசாலிகளின் ஒரு குழுவால்கூட சிரமப்பட்டுத்தான் தூக்க முடியும். ஒரு தடவை அவனுடைய சமூகத்தார் அவனிடம் கூறினார்கள். “நீ பூரித்து விடாதே! ஏனெனில், பூரித்திருப்பவர்களை அல்லாஹ் நேசிப்பதில்லை.(அல்குர்ஆன் : 28:76)

 * அழிவிற்கான காரணம்: அவர் தனது செல்வத்தை இறை வழியில் செலவிட மறுத்தான். "இது எனது அறிவாலும் திறமையாலும் கிடைத்தது" என்று பெருமை கொண்டான். ஏழைகளுக்கு உதவச் சொன்னபோது ஆணவமாகப் பேசினான்.

 * வரலாறு: இறுதியாக இறைவனின் கட்டளையால்,காரூன் மற்றும்அவனது பிரம்மாண்டமான மாளிகை, செல்வம் அனைத்தும் பூமிக்குள் புதையுண்டு அழிந்து போனது. இன்றும் 'பூமிக்கடியில் புதைந்திருக்கும் புதையல்' என்ற சொல்லுக்கு காரூனின் பெயரே உதாரணமாகக் கூறப்படுகிறது.

2.தோட்டக்காரர்கள் (People of the Garden)

இவர்களின் வரலாறு திருக்குர்ஆனின் 68-வது அத்தியாயத்தில் (ஸூரத்துல் கலம், 17-33) விவரிக்கப்பட்டுள்ளது.

 * பின்னணி: ஒரு நேர்மையான தந்தை ஒரு பெரிய தோட்டம் வைத்திருந்தார். அவர் அறுவடையின் போது ஏழை எளியவர்களுக்கு ஒரு பகுதியைத் தர்மமாக வழங்கும் பழக்கம் கொண்டிருந்தார்.

 * அழிவிற்கான காரணம்: அவர் மறைவுக்குப் பின், அவரின் மகன்கள் "ஏழைகளுக்கு எதுவும் தரக்கூடாது" என்று முடிவு செய்தனர். தர்மம் செய்வதைத் தவிர்க்க, ஏழைகள் விழிப்பதற்கு முன்பே அதிகாலையில் சென்று பழங்களைப் பறித்துவிடத் திட்டமிட்டனர்.

 * வரலாறு: அவர்கள் திட்டமிட்டுச் சென்றபோது, இறைவன் அவர்களின் தோட்டம் முழுவதையும் தீயினால் எரித்து சாம்பலாக்கினான். காலையில் அங்கு சென்ற அவர்கள், தங்களின் தோட்டம் அடையாளம் தெரியாமல் அழிந்து கிடப்பதைக் கண்டு தங்கள் தவறை உணர்ந்து வருந்தினர்.

கஞ்சதனத்தைப்பற்றி குர்ஆனினின் எச்சரிக்கை

وَلَا يَحْسَبَنَّ الَّذِيْنَ يَبْخَلُوْنَ بِمَاۤ اٰتٰٮهُمُ اللّٰهُ مِنْ فَضْلِهٖ هُوَ خَيْـرًا لَّهُمْ‌ بَلْ هُوَ شَرٌّ لَّهُمْ‌ سَيُطَوَّقُوْنَ مَا بَخِلُوْا بِهٖ يَوْمَ الْقِيٰمَةِ ‌ وَ لِلّٰهِ مِيْرَاثُ السَّمٰوٰتِ وَالْاَرْضِ‌ وَاللّٰهُ بِمَا تَعْمَلُوْنَ خَبِيْرٌ

அல்லாஹ் தனது அருளிலிருந்து தங்களுக்கு வழங்கியவற்றில் எவர்கள் கஞ்சத்தனம் புரிகின்றார்களோ அவர்கள் அதனைத் தமக்கு நல்லது என எண்ணிவிட வேண்டாம். மாறாக, அது அவர்களுக்கு மிகவும் கெட்டதாகும். தமது கஞ்சத்தனத்தின் மூலம் அவர்கள் சேமித்து வைத்தவை எல்லாம் மறுமைநாளில் அவர்களின் கழுத்தில் விலங்காகப் பூட்டப்படும். வானங்களும், பூமியும் அல்லாஹ்வுக்கே உரித்தானவையாய் இருக்கின்றன. மேலும் நீங்கள் செய்பவற்றையெல்லாம் அல்லாஹ் நன்கறிபவனாக இருக்கின்றான்.

(அல்குர்ஆன் : 3:180)

சுருக்கமாக: செல்வம் என்பது இறைவனால் வழங்கப்பட்ட ஒரு சோதனை. அதைத் தர்மம் செய்யாமல் பதுக்கி வைப்பது இம்மையிலும் மறுமையிலும் பெரும் நஷ்டத்தையே ஏற்படுத்தும் என்பதை இந்த வரலாறுகள் நமக்கு உணர்த்துகின்றன.

* இறைவழியில் நாம் என்னசெலவு செய்யவேண்டும்?

அல்லாஹ் கூறுகிறான்:

  وَيَسْــٴَــلُوْنَكَ مَاذَا يُنْفِقُوْنَ  قُلِ الْعَفْوَ‌ كَذٰلِكَ يُبَيِّنُ اللّٰهُ لَـكُمُ الْاٰيٰتِ لَعَلَّکُمْ تَتَفَكَّرُوْنَۙ‏

 "(இறைவழியில்) என்ன செலவு செய்யவேண்டும் எனவும் அவர்கள் உம்மிடம் கேட்கின்றனர். ''உங்களுடைய தேவைக்குப்போக மீதமுள்ளதை செலவு செய்யுங்கள்"" என அவர்களிடம் கூறுவீராக!. இவ்வாறு அல்லாஹ் தன் கட்டளைகளை உங்களுக்குத் தெளிவாக விவரிக்கின்றான். நீங்கள் இம்மை - மறுமை பற்றி கருத்தூன்றிச் சிந்திக்கவேண்டும் என்பதற்காக!" (02:219)

مَنْ ذَا الَّذِىْ يُقْرِضُ اللّٰهَ قَرْضًا حَسَنًا فَيُضٰعِفَهٗ لَهٗۤ اَضْعَافًا کَثِيْرَةً  ‌ وَاللّٰهُ يَقْبِضُ وَيَبْصُۜطُ وَ اِلَيْهِ تُرْجَعُوْنَ‏

"அல்லாஹ்வுக்கு அழகிய கடன் கொடுப்போர்(உங்களில்) யார் உள்ளர்? (அப்படிக் கடன் கொடுத்தால்) அல்லாஹ் அதனைப் பல மடங்குகளாக்கி அவர்களுக்குத் திருப்பிக் கொடுப்பான்"(02:245)

நாம் இறைவழியில் செலவு செய்யும் போது நமது எண்ணம் அல்லாஹ்வுக்காக இதைச் செய்கிறேன் என உறுதியாக இருக்கவேண்டும். பிறர் நம்மைப் புகழவேண்டும் என்பதற்காக செய்யக்கூடாது. மேலும் கொடுத்ததை சொல்லிக் காட்டவும் கூடாது.

அல்லாஹ் கூறுகிறான்: 

"இறைநம்பிக்கை கொண்டோரே! அல்லாஹ்வின் மீதும், மறுமை நாளின் மீதும் ஈமான் கொள்ளாமல், மனிதர்களுக்குக் காண்பிப்பதற்காகவே தனது பொருளைச் செலவு செய்பவனைப்போல நீங்களும் கொடுத்ததைச் சொல்லிக் காண்பித்தும், மனம் புண்படச் செய்தும் உங்களுடைய தான தர்மங்களைப் பாழாக்கி விடாதீர்கள்" (02:264). 

எனவே அல்லாஹ்வுக்காக நாம் செலவு செய்யவேண்டும்.

கஞ்சத்தனம் செய்யக்கூடாது. 

அல்லாஹ் கூறுகிறான்: "இதோ! (பாருங்கள்) அல்லாஹ்வின் வழியில் செலவு செய்யுங்கள் என்று உங்களுக்கு அழைப்பு விடுக்கப்படுகின்றது. இவ்விசயத்தில் கஞ்சத்தனம் காட்டுகின்ற சிலர் உங்களில் இருக்கின்றனர். ஆனால், யார் கஞ்சத்தனம் செய்கிறாரோ, அவர் உண்மையில் தன் விசயத்திலேயே கஞ்சத்தனம் செய்து கொண்டிருக்கிறார். அல்லாஹ்வோ தேவைகள் அற்றவன். நீங்கள்தான் (அவன் பக்கம்) தேவையுடையோர்களாய் இருக்கின்றீர்கள். நீங்கள் புறக்கணித்துவிட்டால், அல்லாஹ் உங்களுடைய இடத்தில் வேறு ஒரு சமுதாயத்தைக் கொண்டுவருவான்: மேலும், அவர்கள் உங்களைப் போல் இருக்கமாட்டார்கள்".(47:38)

கஞ்சத்தனம் செய்வது மிக மோசமான செயலாகும். 

அல்லாஹ் கூறுகிறான்: "எனவே, உங்களால் முடிந்த வரை அல்லாஹ்வுக்கு அஞ்சிய வண்ணம் வாழுங்கள். மேலும் செவிதாழ்த்திக் கேளுங்கள், கீழ்படியுங்கள். மேலும், உங்கள் செல்வத்தை செலவு செய்யுங்கள். இது உங்களுக்கே சிறந்ததாகும். தம்முடைய உள்ளத்தின் கஞ்சத்தனத்தை விட்டு எவர்கள் விலகி இருக்கின்றார்களோ அத்தகையவர்கள்தாம் வெற்றி பெறக் கூடியவர்கள். நீங்கள் அல்லாஹ்வுக்கு அழகிய கடன் கொடுத்தால், அதனை அவன் உங்களுக்கு பன்மடங்கு அதிகமாக்கித் தருவான். மேலும் உங்கள் பாவங்களைப் புறக்கணித்துவிடுவான். அல்லாஹ் உரிய மதிப்பளிப்பவனாகவும், சகிப்புத் தன்மை கொண்டவனாகவும் இருக்கின்றான். மறைந்திருப்பவை மற்றும் வெளிப்படையானவை அனைத்தையும் அறிந்தவனாகவும் இருக்கின்றான். வல்லமை மிக்கவனாகவும், நுண்ணறிவாளனாகவும் இருக்கின்றான்".(64:16,17,18) எனவே நாம் மறுமையில் வெற்றிக்காக இறைவழியில் செலவு செய்தே ஆகவேண்டும்.

எப்படி இறைவழியில் செலவு வேண்டும் என்றால் 1. ஜகாத் 2. ஸதகா என்ற இருவழிகளில் செய்யலாம். ஜகாத்தைக் கணக்கிட்டுக் கொடுக்கவேண்டும். இல்லையென்றால் நாளை மறுமையில் தண்டனை உண்டு. ஜகாத்தைத் தனியாகவும் கொடுக்கலாம். ஆனால் தனிநபராகத் கொடுப்பதை விட ஒரு கூட்டமைப்பாக சேர்ந்து கொடுப்பது சிறந்ததாகும். நபி(ஸல்) அவர்கள் காலத்திலும், கலீஃபாக்களின் காலத்திலும் மொத்தமாக ஜகாத்தை வசூலித்து பிறகு அதைப் பங்கு வைத்தார்கள். இப்படியே நாமும் செய்யவேண்டும்.

அடுத்து நாம் மனமுவந்து ஸதகா(தர்மம்) செய்யவேண்டும். குறிப்பாக நம் உறவுகளில் இருக்கும் ஏழைகளுக்கு உதவவேண்டும். நாம் தர்மம் செய்கின்றபொழுது நமக்காக வானவர்கள் பிரார்த்திக்கின்றனர். 

நபி(ஸல்) அவர்கள் கூறினார்கள், " தினமும்இருவானவர்கள் வருகின்றார்கள் ஒருவர் தானதர்மம் செய்பவருக்கு செல்வத்தை மேலும் வழங்கு என்றும், மற்றொருவர் கஞசனுக்கு நஷ்டத்தைக் கொடு என்றும் பிரார்த்திக்கின்றனர்".  (அறிவிப்பாளர்: அபூஹுரைரா(ரலி)).

நம்மிடம் இருக்கும் அத்தனை செல்வங்களையும் செலவிட வேண்டும் என்பதில்லை. 

அல்லாஹ் கூறுகிறான்: 

وَلَا تَجْعَلْ يَدَكَ مَغْلُوْلَةً اِلٰى عُنُقِكَ وَلَا تَبْسُطْهَا كُلَّ الْبَسْطِ فَتَقْعُدَ مَلُوْمًا مَّحْسُوْرًا‏

"உமது கையை கழுத்தோடு சேர்த்து கட்டிவிடாதீர். முற்றிலும் அதனை விரித்துவிடாதீர். அப்படிச் செய்தால் பழிப்புக்குரியவராகவும் இயலாதவராகவும் நீர் ஆகி விடுவீர்" (17:29)

எனவே கஞ்சத்தனமும் கூடாது, ஒரேயடியாக எல்லாவற்றையும் செலவும் செய்யக் கூடாது. நடுநிலையோடு செயல்பட்டு மற்றவர்களுக்கு உதவி செய்தோம் என்றால் நம்முடைய இம்மை, மறுமை வாழ்வு வெற்றி பெற்றதாக அமையும்.

*செலவு செய்யக்கூடிய 5. வழிகள்.

இறைவழியில் (fī sabīlillāh) செலவு செய்வது என்பது வெறும் பணத்தை மட்டும் கொடுப்பது அல்ல; அது ஒரு மனநிலை. இஸ்லாமிய அடிப்படையில் இறைவழியில் செலவு செய்யக்கூடிய பல்வேறு வழிகள் இதோ:

1. கட்டாயக் கடமைகள் (Fardh)

முதலில் நம் மீது கடமையாக்கப்பட்ட வழிகளில் செலவு செய்வது மிக முக்கியம்.

 * ஜகாத்: உங்கள் சேமிப்பு ஒரு குறிப்பிட்ட அளவை (நிஸாப்) எட்டும்போது, அதில் 2.5% ஏழைகளுக்கு வழங்குவது.

 * குடும்பப் பராமரிப்பு: உங்கள் மனைவி, பிள்ளைகள் மற்றும் பெற்றோரின் தேவைகளை நிறைவேற்றுவது ஒரு சிறந்த தர்மமாகும் (ஸதகா).

2. சமூக நலப் பணிகள் (Sadaqah Jariyah)

நீங்கள் மறைந்த பிறகும் உங்களுக்கு நன்மைகளைத் தரக்கூடிய நிலையான தர்மங்கள்:

 * கல்வி உதவி: ஏழை மாணவர்கள் கல்வி கற்க உதவுவது, பள்ளிக்கூடங்கள் அல்லது மதரஸாக்களுக்குத் தேவையான உபகரணங்கள் (புத்தகங்கள், சீருடை) வாங்கித் தருவது.

 * குடிநீர் வசதி: தண்ணீர் பற்றாக்குறை உள்ள இடங்களில் கிணறு வெட்டுவது அல்லது சுத்திகரிக்கப்பட்ட குடிநீர் வசதி செய்து தருவது.

 * மரம் நடுதல்: நிழலுக்காகவும் உணவிற்காகவும் மரங்களை நடுவது.

3. மஸ்ஜித் மற்றும் மதக் கல்வி

 * பள்ளிவாசல் பராமரிப்பு: மஸ்ஜித்கள் கட்டுவதற்கோ அல்லது அதன் மின்சாரம், தண்ணீர் போன்ற பராமரிப்புச் செலவுகளுக்கோ உதவுவது.

 * தீனியாத் கல்வி: மார்க்கக் கல்வி கற்கும் மாணவர்களுக்கு உணவு அல்லது தங்குமிட வசதிகளை ஏற்படுத்திக் கொடுப்பது.

4. எளியவர்களுக்கான உதவிகள்

 * உணவு அளித்தல்: பசியால் வாடுபவர்களுக்கு உணவு வழங்குவது இஸ்லாத்தில் மிகச்சிறந்த நன்மையாகக் கருதப்படுகிறது.

 * மருத்துவ உதவி: ஏழைகளின் மருத்துவச் செலவுகள் அல்லது மருந்துகள் வாங்க உதவுவது.

 * கடனைத் தீர்க்க உதவுவது: கடன் சுமையால் தவிப்பவர்களின் கடனை அடைக்க உங்களால் முடிந்த தொகையைக் கொடுப்பது.

5. சில முக்கியமான ஒழுக்கங்கள்

இறைவழியில் செலவு செய்யும்போது கவனிக்க வேண்டியவை:

 * தூய்மையான எண்ணம் (Ikhlas): புகழ் தேடுவதற்காக இல்லாமல், இறைவனின் திருப்திக்காக மட்டுமே செய்ய வேண்டும்.

 * நல்ல சம்பாத்தியம்: ஹலாலான (நேர்மையான) முறையில் ஈட்டிய பணத்தையே தர்மம் செய்ய வேண்டும்.

 * புண்படுத்தாமை: உதவி செய்த பிறகு அதைச் சொல்லிக் காட்டிப் புண்படுத்தக் கூடாது.

لَيْسَ عَلَيْكَ هُدٰٮهُمْ وَلٰـكِنَّ اللّٰهَ يَهْدِىْ مَنْ يَّشَآءُ‌ (وَمَا تُنْفِقُوْا مِنْ خَيْرٍ فَلِاَنْفُسِكُمْ‌ وَمَا تُنْفِقُوْنَ اِلَّا ابْتِغَآءَ وَجْهِ 

اللّٰهِ‌ وَمَا تُنْفِقُوْا مِنْ خَيْرٍ يُّوَفَّ اِلَيْكُمْ وَاَنْـتُمْ لَا تُظْلَمُوْنَ‏

"நீங்கள் எதைச் செலவு செய்தாலும் அது உங்களுக்கே நன்மையாகும். அல்லாஹ்வின் திருப்தியை நாடியே தவிர நீங்கள் செலவு செய்யாதீர்கள்." (அல்குர்ஆன் 2:272)

*இறைவழியில்செலவு செய்யும்போதுஎவற்றையெல்லாம் தவிர்க்க வேண்டும்*.

-தவிர்க்க வேண்டிய 6 விஷயங்கள்.-

இறைவழியில் செலவு செய்யும்போது அல்லது பொதுவான தர்மங்களின் போது, சில செயல்கள் அந்த நன்மையையே அழித்துவிடும். எவற்றையெல்லாம் தவிர்க்க வேண்டும் என்பதைப் புரிந்துகொள்வது மிக அவசியம்:

1. முகஸ்துதி (பிறர் புகழ வேண்டும் என்று செய்தல்)

மக்கள் உங்களை "பெரிய வள்ளல்" அல்லது "தர்மவான்" என்று புகழ வேண்டும் என்பதற்காகச் செய்வது. இது இறைவனிடம் ஏற்றுக் கொள்ளப்படாது. உங்கள் நோக்கம் (Niyyah) இறைவனின் திருப்தி மட்டுமே இருக்க வேண்டும்.

2. சொல்லிக்காட்டுதல் மற்றும் புண்படுத்துதல்

உதவி செய்த பிறகு அதை மற்றவர்களிடம் தம்பட்டம் அடிப்பதோ அல்லது உதவி பெற்றவரைப் பார்த்து "நான் உனக்கு அன்று உதவினேனே" என்று நினைவுபடுத்தி அவரைச் சிறுமைப்படுத்துவதோ கூடாது. இது செய்த தர்மத்தின் பலனை முழுமையாக அழித்துவிடும்.

3. ஹராமான வருமானத்திலிருந்து செலவிடுதல்

தவறான வழியில் (லஞ்சம், வட்டி அல்லது நேர்மையற்ற தொழில்) ஈட்டிய பணத்திலிருந்து தர்மம் செய்வதை இறைவன் ஏற்பதில்லை. இறைவன் தூய்மையானவன், தூய்மையானவற்றையே அவன் ஏற்கிறான்.

4. தரமற்ற பொருட்களைக் கொடுத்தல்

நமக்குத் தேவையில்லாத, கிழிந்த அல்லது பழைய தரமற்ற பொருட்களை மட்டும் தர்மம் செய்வது முறையல்ல. குர்ஆன் கூறுகிறது: "நீங்கள் எதை நேசிக்கிறீர்களோ அதிலிருந்து செலவு செய்யாதவரை நீங்கள் நன்மையைப் பெற முடியாது" (3:92).

5. குடும்பத்தைப் புறக்கணித்துவிட்டுச் செய்தல்

தன் குடும்பத்தினர் பசியிலும் கஷ்டத்திலும் இருக்கும்போது, அவர்களைக் கவனிக்காமல் ஊருக்குத் தர்மம் செய்வது முறையல்ல. முதலில் உங்கள் குடும்பம், பிறகு நெருங்கிய உறவினர்கள், அதன் பின்னரே மற்றவர்களுக்கு முன்னுரிமை அளிக்க வேண்டும்.

6. கடனை வைத்துக் கொண்டு தர்மம் செய்தல்

பெரிய அளவில் கடன் வைத்திருப்பவர்கள், முதலில் அந்தக் கடனை அடைப்பதற்கே முன்னுரிமை கொடுக்க வேண்டும். கடனை அடைக்க வேண்டியது கட்டாயக் கடமை (Wajib), தர்மம் செய்வது உபரியான (Sunnah) செயல்.

சுருக்கமாக கவனிக்க வேண்டியவை:

 * ஆணவம்: "நான்தான் இவ்வளவு கொடுக்கிறேன்" என்ற தலைக்கனம் வரக்கூடாது.

 * அதிர்ச்சி தரும் செலவு: சொத்தில் மூன்றில் ஒரு பங்குக்கு மேல் (மரண சாசனமாக இருந்தால்) தர்மம் செய்துவிட்டு, வாரிசுகளை நடுத்தெருவில் விடுவது கூடாது.